احلى حياة ... اخترت الاسم دا لمدونتى لأنى فعلا نفسى اعيش احلى حياة من غير وجع دماغ هدفى انى اعيش احلى حياه بشرط ان ضميرى يكون مستريح وانى اتعامل مع الحياه ببساطه ... فيها ايه يعنى انى سنى كبير ولسه متجوزتش عادى جداً لسه بكون نفسى اى نعم انا وسيم والحمد لله وشخصيه الى حد ما وفقا لكلام اصدقائى رائعه بس عادى جدا انى متجوزتش ايه يعنى انا لسه شاب فى سن الاربعين .. ايه يعنى متعلم ومثقف ومعايا كمبيوتر ودراسات عليا وبتاجر فى العلافه عشان ملقتش شغل لأن الشغل لازم معاه انجليزى ماهو التعليم بتاعنا الواحد بيخلصه عشان يبدأ يتعلم من جديد على حسابه تعليم جديد خاص للشغل ... طب بيبنى وبينكوا دى حاجه تستحق انى احرق دمى طب واحرق دمى ليه .. انا هدفى اعيش حياة سعيده
ايه يعنى البيضه بقت بخمسين قرش فيها ايه يعنى خلى التجار يكسبوا احنا ليه وحشين كدا يا مصريين ليه بنحقد على الناس وبنبصلهم فى رزقهم
ايه يعنى مش بشتم فى الحكومه ولا فى الريس ولا مضايق ان جمال يبقى الريس الجديد ولا غيره ... طب بينى وبينكوا لو انا شتمت او مشتمتش مش هيه بردو هتفضل الحكومه يبقى انا الافضل اشوف نفسى واكون نفسى واتجوز
متقولوش انى رجعى ولا سلبى ولا متخلف .. طب انا عايز افكر معاكو تعلوا بكره كده اجيب حوالى 5000 واحد من زمايلى واد خمسميه كمان من عند عم موسى الاهوجى اللى جنبنا من العاطلين على عم على بتاع الفول والشيخ محمد بتاع الفراخ ونروح نعمل مظاهرة قدام رئاسة الوزراء ونطالب بحقنا ونقلب الدنيا هه؟؟؟؟؟؟؟؟؟؟ ايه اللى هيحصل ولا حاجه
يأما هنتمسك ويحاولوا يلبولنا مطالبنا فى امن الدوله بس طبعا الدوله مشكوره عليها اعباء كتير واحنا هنقدر وهنقولهم براحتكوا لما تخلصوا اعبائكم ابقوا شوفوا مطالبنا
ياما هنتمسك بردو وهيشوفوا مطالبنا بردو ويحاولوا يحققوها ونرجع نقعد على قهوة عم موسى والست ام احمد جارتنا بردو هتيجى تاخد من عندى عدس شكك عشان تأكل السبع عيال من اول الواد زئرد الصغير لغاية الواد محروس الكبير اللى فى ثانوى تجارى
وحياة امه لو كان مش فى ثانوى تجارى دا لو كان فى جامعه بردو هيشتغل مع اللسطه عبده النقاش
ها يبقى اوجع دماغى ليه ... يبقى الاولى انى اعيش مع نفسى احلى حياة واتجوز
طب اقولكوا على سر بقى انى مكون نفسى بقالى خمس سنين بس مش لاقى عروسه مع انى والله شكلى صغير وسنى لسه هخش على الاربعينيات ولسه شاب خام زى مانا مفيش اى بنت عملت معايا اى حاجه اصلى بصلى وعارف ربنا
اقولكوا هنكمل بعدين
بس انا نفسى تيجوا تعيشوا معايا احلى حياة
